in

LoveLove

Kum 60 a liam cang nain mipi nih philh khawh rih lo mi “Merilyn Monroe”

A sam sui zawng bantuk a si i pa chim lo, nu hmanh nih an thihhnawh deng mi vawleipi a hnin khotu Merilyn Monroe cu ruah lo tuk in kum no te a si lio ah a nunnak a liam. A thihnak kum 60 a tling cang nain nihin tiang mi tam pi thinlung ah a tlau kho lo i an theih camcin mi Mintami (actress) a si.

1962 August 5 ah California ram kulh Brentwood palek sakhaan ah khuaruah har launak phone pakhat a rak ring. Cucu, kum 36 te lawng a si rih mi vawlei cung muidawh minthang Merilyn Monroe a thi, ti mi thawng a si.

A ruak hi a sin-um nih a hmuh hmasabik. A thih ah hin a kut khatlei in telephone ai tlaih. A pawngkam ah mitkuh sii dur pawl tampi a um. Cucaah amah tein ai that mi a si lai, tiah an ruah nain amah thazaang pe tu parihtet pawl nih an zum kho lo…..mah tein thah a si lai lo, tiah an chim cio.

Thuh mi diary a ngei maw? Mah hi hi Monroe thihnak kong ah an i al cio mi a si. Cucu ai phundang ngai mi diary pakhat Monroe nih a ngei ti hi a si. Hi ca uk ah hin nainganzi kong zong i tial sehlaw theih lo a si, an ti.

Tahchunhnak in chim ahcun American President John F. Kennedy le a naupa Sihnichoh a si mi Robert Kennedy he Monroe hi an unau pahnih he an phohpian lengmang ti a si.

Lawmhnak le harnak tampi lak ah Monroe cu 1950 in 1960 kum kar hi Holywood mintami min thang bik a si. Mi thinlung la kho biktu mintami zong a si. Kum-hra bu chung ah aman fak bik mi mintami zong a si. Zuksin ai thlak mi hi US Dollar nuai 200 tluk man a si i atu chan tangka man he tuak ahcun US dollar 2 billion tluk a si.

Zuksin hi 37 hrawng ai thla i a minthang deuh mi zuksin hna cu, Some Like It Hot, Gentlemen Prefer Blondes, The Seven Year Itch, Niagara, River of No Return, ti bantuk an si.

Cutin a min thang ko nain riihaisii a tawngh hnu in thinphan tuknak, lungre theih tuknak, ngaihchiat fawi tuk, tih le lau tuk in umnak, zaan i hngilh khawh lo ti bantuk in thinlung zawtnak zong a ngei phah mi a si. Rian biapi zong philh a hmang. Dialogue ah biachim ding a si hna a philh. Video i thla ding a si hna a philh ca ah a ni an thawn ti bantuk in a thluak dik lo in a um.

Monroe cu pasal voi 3 tial a ngei mi a si. 1942 in 1946 tiang Palek bawi James Dougherty he an i um. 1954 in 1955 tiang Lente celh thiam Joe DiMaggio he an i um. 1956 in 1961 tiang Arthur Miller he an i um.

A thihnak a ruang hi riihaisii a tawng mi a si ruang ah amah tein ai that tiin an ruah. A thih lio ah tukden nak pawl hma pawl zong a um lo ca ah sii in ai that mi a si, tiah an zumh nain a hnu ahcun American President John F. Kennedy, a naupa Robert Kennedy, American Lobour hruaitu Jimmy Hoffa le misual phu hruaitu Sam Giancana hna he nainganzi kong ah a thli thup in riantuan mi a um ca ah Monroe hi an thah mi a si, tiah an zumh.

1982 kum ah Los Angelis Sihni zung ah Monroe kong cu an check hlat than nain tehte fek ngai ngai a um lo ca ah biachah khawh a rak si thai lo.

Zeitin a thih ti hmanh nihin tiang a fiang kho ti lo mi, riithaisii a tawng tuk mi nu a si nain a muidawhnak le minthannak cu nihin tiang mipi nih an philh khawh rih lo mi mintami a si.
Ref: San Yit Wine

What do you think?

Written by drzero.net

Leave a Reply

Your email address will not be published. Required fields are marked *

GIPHY App Key not set. Please check settings

A leihthei tuk mi mi Sayamah nute (part 1)